RAZER-ИЙН ХАМТРАН БҮТЭЭСЭН HYCAN EV V09
Зарим Gamer-үүд Razer-ийн бүтээсэн Gear-үүдийг эрхэмлэн сонгодог.
Төрөл бүрийн Gear-үүд нь үзүүлэлт, гоёмсог Chroma RGB болон чанартай байдгаараа давуу талтай билээ.
Тэгвэл үйлдвэрлэгч HYCAN-тaй хамтран Razer цахилгаан машинаа албан ёсоор танилцуулаад байна!
“Mobile E-Sports Fortress” гэх HYCAN Ev V09 цахилгаан машин нь зөвхөн Razer-ийн Gaming Setup-аар тоноглогдсоноороо онцлогтой!
Тансаг зэрэглэлийн уг minivan-д 4 зорчигч суух бөгөөд ардаа хоёр том дэлгэц, өндөр үзүүлэлттэй Gaming PC, Gear-үүд багтжээ. +Chroma RGB гэрэлтүүлэгтэй! 🚐✨
Одоогийн байдлаар үнэ, худалдаанд гарах тов нь тодорхойгүй боловч захиалгаар eSports-ийн мэргэжлийн баг, сонирхсон хэрэглэгчдэд нийлүүлэхээр төлөвлөөд байгаа аж.
Аян замд хаана ч тоглох боломжийг бүрдүүлсэн жинхэнэ Gaming Party Van байна даа. 🥳
ChatGPT системийн алдааг олсон хүн $20,000-аар шагнуулна
Дэлхийн технологийн ертөнцийг шуугиулж байгаа ChatGPT хиймэл оюунд суурилсан чатботын алдаа доголдлыг илрүүлбэл их хэмжээний мөнгөн шагналаар урамшуулахаа OpenAI компани мэдэгджээ.
“Bug Bounty Program” хөтөлбөрийг тус компани өчигдөр зарласан бөгөөд ChatGPT системийн эмзэг цэг, алдаа доголдол, аюулгүй байдлын цоорхойг илрүүлж, засварлах зорилготой юм байна.
Шагналын хэмжээ илрүүлсэн алдааны ач холбогдлоос хамаараад $200-аас $20,000 хүртэл байх ажээ.
Хөтөлбөрөө хэрэгжүүлэхдээ OpenAI компани энэ чиглэлд ажиллаж, мэргэжилтнүүдийг том компаниудтай холбож өгдөг Bugcrowd байгууллагатай хамтарсан байна.
Bugcrowd байгууллагын вэб хуудсаар илгээсэн мэдээлэлд хоёр цагийн дотор хариу өгч, илрүүлсэн гэмтлийг хүлээн зөвшөөрөх үгүйгээ мэдэгдэх гэнэ.
Хөтөлбөрийг зарласнаас хойш (энэ мэдээ нийтлэгдсэн цагийн байдлаар) 23 алдааны мэдээллийг хүлээн авч, дунджаар нэг алдаанд $1,054.54-ын мөнгөн шагнал олгосныг дээрх хуудсанд мэдээлжээ.
Эх сурвалж: Business Insider
Google-ийн шинэ чатбот нэг асуултад буруу хариулсны улмаас зах зээлийн үнэлгээ нь $100 тэрбумаар буурав
Ойрын өдрүүдэд технологийн ертөнцөд хайлтын системүүдийн өрсөлдөөн ширүүсэж байна. Энэ зах зээлд ноёлдог Google компани Даваа гарагт хайлтын системээ Bard нэртэй хиймэл оюунд суурилсан чатбот системээр хүчирхэгжүүлж байгааг зарласан юм.Дараа өдөр нь Майкрософт компани Bing хайлтын системдээ ChatGPT хиймэл оюунд суурилсан чатботыг нэвтрүүлж байгааг зарлажээ.Дэлхийн хайлтын системийн зах зээлийн 84 хувийг Google, 9 хувийг Bing эзэлдэг.Тиймээс Майкрософтын шинэчлэлт нь сүүлийн 20 орчим жил энэ зах зээлд ноёлж буй Google-ийн хувьд том сорилт болж байгаа.Ийм хариуцлагатай цаг үед Google-ийн Bard чатбот алдаа гаргасан нь өчигдөр том дуулиан болж, толгой компани Alphabet-ийн хувьцааны ханшийг огцом унагасан байна.Google өчигдөр Bard чатбот нь асуултад хэрхэн хариулж буйг харуулсан жишээтэй видео сурталчилгааг Твиттер хуудсандаа нийтэлсэн юм.“Есөн настай хүүхдэдээ JWST (James Webb Space Telescope) сансрын телескопын шинэ нээлтийн талаар хэлж өгөх баримт байна уу?” гэсэн асуултад хариулахдаа Bard уг телескопыг нарны аймгийн гадна оршдог гарагийн зургийг анх удаа буулгасан хэмээн алджээ. Үнэн хэрэгтээ анхны ийм гэрэл зургийг Европын VLT (Very Large Telescope) телескоп 2004 онд буулгаж байсан юм. “Системийг сайтар туршихын ач холбогдлыг энэ алдаа харуулж байна. Тиймээс бид энэ долоо хоногоос Trusted Tester хөтөлбөрөө эхлүүлж байгаа. Бид Bard-ийн хариултууд бодитой, үндэслэлтэй, үнэн зөв байх өндөр шалгуурыг хангасан эсэхийг шалгахдаа дотоодын туршилтуудыг гаднын санал хүсэлтүүдтэй хослуулах болно” гэж Google компанийн төлөөлөгч энэ явдлын дараа мэдэгдсэн байна. Даваа гарагт танилцуулахдаа тус компани Bard системийг эхний ээлжид хязгаарлагдмал хүрээнд турших, дараа нь нийт зах зээлд нэвтрүүлэхээр төлөвлөж байгаа тухай мэдээлсэн юм. Өчигдрийн алдааны дараа Google-ийн толгой Alphabet компанийн хувьцааны ханш 9 орчим хувиар унаж, зах зээлийн үнэлгээ нь $100 тэрбумаар буурсан байна. Харин Майкрософтын хувьцааны ханш эсрэгээрээ 3 орчим хувиар өсжээ. Энэ үзэгдэл нь зөвхөн Bard-ийн оновчгүй хариултаас болоогүй, ерөнхийдөө онлайн хайлтын зах зээлд Google-ийн байр суурь ганхаж эхэлж болзошгүй гэсэн айдас хөрөнгө оруулагчдын дунд бий болсонтой холбоотой гэж ажиглагчид үзэж байна. Хүмүүсийн асуулт, хүсэлтийг зөв ойлгож, интернэтээс цуглуулсан мэдээллүүдийг боловсруулаад хамгийн оновчтой ганц хариултыг өгдөг болох, үүндээ хиймэл оюуны технологийг ашиглах нь хайлтын системүүдийн өрсөлдөөний дараагийн шинэ үе шат болж байгаа. Олон жил өрсөлдөөнд ялагдсаар ирсэн Майкрософт саяхан энэхүү шинэ талбарт эхнээсээ санаачилгыг гартаа авах зорилгоор ChatGPT чатботыг хөгжүүлэгч OpenAI компанид олон тэрбумын хөрөнгө оруулсан юм.
Эх сурвалж: IKON
IV УЛИРАЛД “APPLE”-ИЙН БНХАУ-ЫН ЗАХ ЗЭЭЛД ЭЗЛЭХ ХУВЬ ДЭЭД ХЭМЖЭЭНД ХҮРЭВ.
2022 оны сүүлийн улиралд “iPhone”-ийн борлуулалт БНХАУ дахь нийт ухаалаг гар утасны борлуулалтын 24 хувийг эзэлжээ.
Цар тахлын хязгаарлалтаас үл хамааран “Apple” компанийн БНХАУ-ын зах зээлд эзлэх хувь дээд хэмжээнд хүрлээ. Тодруулбал: 2022 оны сүүлийн улиралд “iPhone”-ийн борлуулалт БНХАУ дахь нийт ухаалаг гар утасны борлуулалтын 24 хувийг эзэлснийг “Counterpoint”-ийн судалгаа харуулж байна.
Ингэснээр өнгөрсөн оны IV улиралд бусад ухаалаг гар утас үйлдвэрлэгчдийг ардаа орхижээ. Мөн жилийн дүнгээр 2022 онд БНХАУ дахь борлуулалтаараа анх удаа хоёрдугаарт бичигдсэн байна.
Өнгөрсөн онд “Apple” цар тахлын хязгаарлалтын улмаас нийлүүлэлтийн доголдолтой нүүр тулсан юм. Хэдий тийм боловч “Vivo”, “Oppo”, “Xiaomi” зэрэг дотоодын үйлдвэрлэгчидтэй харьцуулахад харьцангуй бага хүндрэлтэй учирсан байна.
Инфляц, бодлогын хүүгийн өсөлтийн нөлөөгөөр дэлхийн эдийн засаг удааширч, олон улсад ухаалаг гар утасны борлуулалт буурч байна. Тухайлбал: БНХАУ-ын зах зээлд ухаалаг гар утасны борлуулалт өнгөрсөн онд хэд хэдэн удаа 10-аас дээш хувиар буурчээ.
“Apple” компани хоёрдугаар сарын хоёрны өдөр орлогын тайлангаа танилцуулна. БНХАУ дахь үйлдвэрүүдийнх нь үйл ажиллагаа тасалдсаны улмаас “iPhone”-ийн “Pro” загварын эрэлт өндөр байсан ч нийлүүлэлт нь буурсан байна.
Эх сурвалж: Bloomberg
“APPLE” НИЙТ ҮЙЛДВЭРЛЭЛИЙНХЭЭ 25 ХУВИЙГ БНЭУ-Д ТӨВЛӨРҮҮЛНЭ.
Одоогоор “Apple” нийт үйлдвэрлэлийнхээ 5-7 орчим хувийг Энэтхэг улсад төвлөрүүлээд байна. “Apple” компани нийт үйлдвэрлэлийнхээ 25 хувийг Энэтхэг улсад төвлөрүүлэхээр төлөвлөж байгааг тус улсын Худалдаа, аж үйлдвэрийн сайд мэдээллээ.
Одоогоор “Apple” үйлдвэрлэлийнхээ 5-7 орчим хувийг БНЭУ-д төвлөрүүлээд байгаа аж. Цаашид 25 хувьд хүргэх зорилт тавьсныг БНЭУ-ын Худалдаа, аж үйлдвэрийн сайд онцолж байна.
“Apple”-ийн гол нийлүүлэгч “Foxconn”, “Pegatron”, “Wistrpon” компаниуд БНЭУ-д ухаалаг гар утасны үйлдвэрлэлээ нэмэгдүүлэхээр хөрөнгө оруулалт татаад байгаа аж.
Дээрх компаниуд 2026 оны эцэс гэхэд “iPhone” гар утасны 20 хувийг Энэтхэгт үйлдвэрлэх зорилт тавьжээ.
БНХАУ-АНУ-ын сөргөлдөөн эрчимжиж, Коммунист намын зарим бодлого үйлдвэрлэлд сөргөөр нөлөөлж байгаагаас “Apple” компани БНХАУ-аас бусад улсад үйлдвэрлэлийн хүчин чадлаа нэмэгдүүлэхийг зорьж байгаа аж. Өнгөрсөн онд “Foxconn”-ийн Жэнжоу хот дахь “iPhone” гар утасны үйлдвэрийн ажилчид хөл хориог эсэргүүцэн, ажил хаялт зарласан юм. Ингэснээр “Apple” үйлдвэрлэлийн зорилтоо бууруулахаар өөр аргагүй болж байв.
Эх сурвалж: Bloomberg